အမေဟာ---
ဂုဏ်ပကာသန၊ မာန်မာန မရှိ
ပကတိ ဖြူစင်တဲ့ ရွှေအတိပြီးသော နှလုံးသားနှင့်
ပင်လယ်ရေပြင်ပမာ ထာဝရ စီးဆင်းနေဆဲပါ။
အမေဟာ---
အမေရဲ့ ဘ၀ကို ကန္တာရ အဖြစ် ကြံ့ကြံ့ခံရင်း
သမီးတို့ မောင်နှမတတွေကို အိုအေစစ် ဖြစ်စေခဲ့တာပါ အမေ။
အမေဟာ---
တိုင်းပြည်ရဲ့ ငြိမ်းချမ်းခြင်းအတွက်
အဖြေမှန်ကို ရှာဖွေကာ ထောက်ပြ
အသက်စွန့်ရမှာကို နည်းနည်းလေးမှ မကြောက်ခဲ့သူပါအမေ။
အမေဟာ---
ဘာဝနာတရားကို ပွားများပြီး
အမေ့ရဲ့ သားသမီးတွေအတွက် အမေ့ရဲ့ တိုင်းပြည်အတွက်
ဘ၀တွေကို ပေးဆပ်
စာတွေ၊ ကဗျာတွေကို ရင်နှင့်သီဖွဲ့
ပြည့်သူတွေရဲ့ ဆန္ဒကို ရာစုတခုကြာ ဖြည့်ဆည်းခဲ့တာကြောင့်
အမေ့ရဲ့ မေတ္တာအလင်းက
နေတစ်စင်းပမာ---
အမေ့ရဲ့ ကရုဏာတရားက
လမင်း ပမာ---
အနှိုင်းမဲ့ သာမြဲ သာနေလျက်ပါ အမေ။
အမေဟာ--
ကဗျာတွေရေး၊ စာတွေရေး
သား၊ သမီးတွေရဲ့ စံပြ
ဘယ်အရာနှင့်မှ နှိုင်းမရတဲ့မိခင်
ရွှင်ကြည်တဲ့ နှလုံးသားမှာ
ကြည်လင်တဲ့ အပြုံးများနဲ့သာ ဖွဲ့တည်ထားနိုင်လွန်းသူပါ။
အမေဟာ--
စစ်အာဏာရှင် တသက်
ဘက်ပေါင်းစုံ ခွန်အားတွေ စိုက်ထုတ်ခဲ့သူမို့
အမေ့အတွက် ဂုဏ်ပြုမှတ်တမ်း
ကောင်းကင် လွင်ပြင် တ၀ှမ်းမှာ
ရောင်စုံပန်းတွေ လန်းလန်း ဖြာခဲ့ပါပြီ အမေ။
အမေဟာ----
သန္ဓေမှန်စွာ ပေါက်ဖွားလာခဲ့တဲ့ အမျိုးသမီးကောင်း
မလျော့သောဇွဲနှင့် တိုက်ပွဲဆင်
စိန်ခေါ်မှု ထောင်သောင်းကို ရင်ဆိုင်
တရားမျှတ ငြိမ်းချမ်းသော လမ်းစဉ်ကို အသေချာကိုင်စွဲ
နောင်လာမယ့် မျိုးဆက်သစ်တို့အတွက် စံနမူနာကောင်းကို ရဲရဲပြခဲ့သူပါ။
အမေ---
လူထုအမေ--
ဘေးမသီ၊ ရန်မခ အန္တရာယ်အပေါင်းမှ ကင်းရှင်းပြီး
အသက်ရာကျော် ရှည်စေကြောင်း
သမီးတို့ မောင်နှမတွေ အားလုံးက ဆုတောင်းလိုက်ပါရစေ အမေ။ ။
အမေလူထုဒေါ်အမာ သက်တော်ရာကျော်ရှည်ပါစေ။
.JPG)
No comments:
Post a Comment